Hai persoas que queren traballar facendo algo que teña sentido. Que escriben ben, preguntan moito e escoitan mellor. Que senten curiosidade polo mundo, polas ideas novas de proxectos pequenos… e polas oportunidades que outros pasan por alto, sobre todo onde o rural late con forza. Se es unha delas, segue lendo.

En Arela buscamos unha persoa que nos axude co desenvolvemento do portal ficaraqui.gal, o portal de emprego e oportunidades do rural galego. Este é un proxecto dixital que fala de emprego, emprendemento e futuro no rural. Buscamos unha mente organizada, creativa e con ganas de sumar desde o principio.

A oferta está localizada en Rebordechán (Crecente), pero é para teletraballar, polo que poderás vivir onde ti queiras. Buscamos unha persoa que poida solicitar unha bolsa FEUGA, para matriculados/as e titulados/as universitarios ou de formación profesional, no ensino público.

Que farás no día a día?

• Colaborar na comunicación e promoción de ficaraqui.gal a través das súas canles dixitais (web, redes, blog, etc.).
• Crear textos e recursos que conecten coa xente que busca alternativas para quedar ou volver ao rural.
• Apoiar na organización e seguimento de tarefas internas.
• Buscar e detectar oportunidades na Galicia rural.
• Participar na relación coas persoas usuarias da web e coas entidades colaboradoras.
• Aportar ideas e melloras para facer medrar o proxecto.

Que esperamos de ti?

• Que saibas escribir en galego con claridade e corrección.
• Que che interese o rural, o emprendemento ou os proxectos con impacto social.
• Que teñas interese por aprender e curiosidade.
• Que te organices ben e que che guste traballar en equipo.
• Que te sintas cómoda traballando en remoto e con autonomía.
• Que teñas uns coñecementos básicos sobre ferramentas de márketing dixital ou aprendas rápido (redes sociais, WordPress…).

Que atoparás aquí?

• Un proxecto que está medrando e que busca ter impacto no mundo rural de Galicia.
• Un equipo que che vai ensinar e deixar facer.
• Un espazo onde aprender, achegar ideas e medrar profesionalmente.
• Flexibilidade para traballar desde onde queiras e presenza puntual cando haxa encontros de equipo.

Como aplicar a esta oferta?

Esta é unha oportunidade pensada para persoas sen experiencia laboral previa, que poidan acollerse a unha bolsa FEUGA, polo que é preciso cumprir unha serie de requisitos, o primeiro deles é estar matriculado ou ter rematados estudos universitarios ou de formación profesional superior no ensino público.

Se che gustou algo do que liches por aquí e cres que encaixas no que andamos buscando, escríbenos porque queremos coñecerte!

Mándanos un correo a ola@arela.gal no que inclúas o teu currículo actualizado e un pequeno texto contándonos por que che gustaría traballar en ficaraqui.gal e ocupar este posto. Non ten que ser nada formal, tan só queremos coñecer a túa motivación, o que te move e como cres que podes encaixar no equipo e no proxecto.