Hai persoas que saben dicir moito en moi pouco. Que escriben como falan: claro, bonito, directo ao punto. Que ven un trend en TikTok e xa están pensando como adaptalo á súa marca. Se es unha delas, segue lendo.

En Arela buscamos unha persoa creativa e con paixón polas redes sociais para crear contidos que conecten cos públicos aos que van dirixidos. Alguén con sensibilidade polos proxectos pequenos, mirada estratéxica e gusto polo detalle.

Nós traballamos desde As Pontes de Gatín (Os Ancares), Rebordechán (Concello de Crecente) e Santaballa (Villalba) pero, como verás máis adiante, a oferta é para teletraballar. Poderás vivir onde ti queiras.

Que farás no día a día?

• Crear contidos para redes sociais: ideas, textos, vídeos, reels, carruseis, stories… Todo o necesario para contar historias que conecten.
• Participar na planificación e execución de calendarios de contidos para distintos clientes.
• Propoñer ideas frescas, adaptadas ao estilo e obxectivos de cada marca coa que traballamos.
• Gravar, editar e publicar pezas audiovisuais (en formatos pensados para redes sociais).
• Escribir copys que funcionen, sen perder a esencia da marca nin do que queremos contar.

Que esperamos de ti?

• Que saibas escribir ben e con estilo, en galego e castelán.
• Que che guste o mundo das redes sociais, esteas ao tanto das tendencias e saibas adaptar o que ves ao que precisa cada cliente.
• Que coñezas ou aprendas rápido sobre ferramentas de edición de vídeo e imaxe (Instagram, CapCut, Canva, etc.).
• Que teñas mirada creativa e un pouco de paixón polos detalles.
• Que sexas resolutiva, organizada e con ganas de aprender.

Que atoparás aquí?

• Flexibilidade e confianza: traballarás desde onde queiras (teletraballo), con encontros presenciais puntuais.
• Proxectos bonitos.
• Un equipo pequeno, comprometido e con bo ambiente laboral.
• Oportunidades de medrar e facer cousas que che gusten.

Como aplicar a esta oferta?

Se che gustou algo do que liches por aquí e cres que encaixas no que andamos buscando, aínda que non cumpras ao 100% cos requisitos, escríbenos porque queremos coñecerte!

Mándanos un correo a ola@arela.gal no que inclúas o teu currículo actualizado e un pequeno texto contándonos por que che gustaría traballar con nós e ocupar este posto. Non fai falta que sexa unha carta formal: queremos coñecer a túa motivación, o que te move e como cres que podes encaixar no equipo e no proxecto.

Non buscamos a persoa perfecta. Buscamos alguén con ganas, con sentido común e con ilusión por sumar no noso pequeno proxecto.