Unha aldea despoboada onde vivir, teletraballar, facer comunidade e gastar menos. Nos últimos tempos naceron en Galicia varios colivings rurais ou o que é o mesmo: vivendas compartidas con espazos comúns para convivir e traballar durante un tempo limitado. Casas restauradas, para familias, ceas compartidas,… estes son algúns dos colivings ubicados no rural galego que máis nos chamaron a atención e que sumámos ao listado dos 10 motivos para Ficar Aquí!
María e Edo, unha galega e un serbio, converteron hai 12 anos Senderiz – unha pequena aldea do concello ourensán de Lobeira – no primeiro coliving rural do mundo.
Restauraron algunhas das casas abandonadas e convidaron a xente de todo o mundo a desconectar da súa realidade e a teletraballar, porque nesta altea presumen da súa conexión a Internet cunha velocidade media de subida e baixada de 160Mpbs.
Este espazo coworking e coliving ten un aforo máximo de 30 persoas e con perfís profesionais de todo tipo.
Outro coworking e coliving con lista de agarda agóchase en Anceu, unha pequena aldea de Ponte Caldelas (Pontevedra). A mediados do ano 2020, Agustín e África puxeron en marcha este proxecto no que se combinan traballo e ocio.
Neste espazo conviven unha media de entre 15 e 20 persoas que cean xuntos de luns a venres. Ademáis desta hai outras actividades conxuntas, como “Entre culturas” na que se reúnen de forma periódica xente do coliving procedente de calquera parte do mundo con xente da aldea. E cada un prepara un prato para o encontro.
En Crecente (Pontevedra) agóchase un pequeno paraíso para todos aqueles nómadas dixitais ou traballadores en remoto que queiran vivir unha experiencia diferente e aos que lles guste a natureza.
Growth Coliving sitúase nun lugar privilexiado onde é posible facer sendeirismo, nadar nunha piscina privada e mesmo relaxarxe nunhas termas xaponesas. Aquí é obrigatorio si ou si facer comunidade polo que cada día prepara a cea un dos usuarios/as. Ofrecen ata 10 habitacións privadas con baño propio para estancias de 10, 15 e 30 días.
O iSlow Costa da Morte é un espazo coliving e coworking rodeado de impresionantes paisaxes, dunha gran riqueza patrimonial e fermosas praias. Pero esta non é a única peculiaridade deste espazo ubicado no lugar de Serantes, en Laxe, xa que é o primeiro de todo o territorio español dirixido a profesionais que se moven coa súa familia.
Inés e Julio, e os seus mellizos, están detrás deste espazo que dispón de habitacións para unha, dúas e cinco persoas.
Os colivins de Sende, Anceu e iSlow están incluídos dentro do proxecto Fixar, impulsado pola Consellería de Emprego, Comercio e Emigración da Xunta de Galicia, e que ten en marcha a súa segunda edición.
Os obxectivos deste programa son reter e atraer a persoas emprendoras para que atopen no rural galego unha oportunidade para vivir e traballar aproveitando todas as sinerxias que lles ofrece o territorio. Precisamente estes días están en pleno proceso de selección de 80 persoas para trasladar a súa residencia ao rural galego.
1 comentario en “Os coliving de Galicia, unha nova maneira de atraer emprendedores ao rural que vai en aumento”
comentario