O GDR Limia-Arnoia dá un paso adiante para o impulso do emprego no seu territorio grazas ao recente acordo de colaboración con Ficar aquí. Este convenio permitiralle contar cun portal de emprego propio e desenvolver un traballo conxunto, entre o equipo de Ficar aquí e o persoal técnico do GDR, para a identificación e difusión de ofertas de traballo e outras oportunidades nos 25 concellos que integran o territorio do GDR Limia-Arnoia.
As oportunidades de emprego no territorio Limia-Arnoia
O futuro dos nosos concellos rurais depende, en boa medida, da creación de emprego e do impulso económico. No territorio Limia-Arnoia contan con empresas que precisan traballadores e traballadoras. E, coma en todos os concellos rurais, existen persoas que queren quedar ou ir vivir alí, sempre que teñan a oportunidade laboral adecuada.
Ficar aquí recolle todo tipo de oportunidades de emprego: desde ofertas de traballo tradicionais ata opcións de relevo xeracional en negocios locais ou proxectos impulsados por emprendedores que buscan persoas socias ou colaboradoras. Estes aspectos están profundamente ligados á realidade social e económica das nosas comarcas.
O GDR Limia-Arnoia convida a empresas, autónomos/as e persoas emprendedoras a rexistrar as súas oportunidades de xeito totalmente gratuíto directamente en Ficar Aquí. Todas as ofertas xeolocalizadas no territorio Limia-Arnoia aparecerán no portal de emprego propio do GDR, converténdose nun punto de encontro clave para quen queira traballar e vivir nas comarcas de Allariz-Maceda, A Limia, Baixa Limia e Terras de Celanova.
Se queres crear unha oportunidade e tes algunha dificultade, podes poñerte en contacto co equipo de Ficar aquí.
53 canles de Whatsapp para non perder ningunha oportunidade
Para facilitar o acceso á información, Ficar aquí non só conta cun portal web e redes sociais, senón tamén cun sistema de 53 canles de WhatsApp, unha por cada comarca galega. Así, podes subscribirte ás que máis che interesen e estar ao tanto das novas oportunidades que van xurdindo en cada zona.
Se formas parte do territorio, aquí tes as canles ás que te podes sumar:
