Se es unha muller liderando un proxecto no rural galego ou coñeces a alguén que o faga, esta convocatoria pode ser de interese para ti, pero ollo, que pronto remata o prazo…
Está aberta a XVI edición dos Premios de Excelencia a la Innovación para Mujeres Rurales, unha iniciativa que busca poñer en valor o traballo e os proxectos de vida das mulleres no rural. Porque si, hai moitas mulleres que non teñen visibilidade nos medios pero que seguen adiante desde o rural, innovando, creando emprego e revitalizando o territorio.
O Ministerio de Agricultura, Pesca e Alimentación premia cada ano proxectos innovadores e sostibles liderados por mulleres, recoñecendo o seu esforzo en diferentes ámbitos. Este ano, a convocatoria conta cunha dotación total de 150.000 euros en premios e distingue catro categorías:
- Excelencia á innovación na actividade agraria
- Excelencia á innovación na actividade pesqueira ou acuícola
- Excelencia á innovación na diversificación da actividade económica no medio rural
- Excelencia á comunicación
Ademais, hai tamén un premio especial para recoñecer a traxectoria de mulleres ou entidades que levan anos loitando polo desenvolvemento do rural.
Entre as premiadas noutras edicións, temos moitas referentes do rural galego, como poden ser as mulleres que lideran Milhulloa, a Agrupación de Mariscadoras do Esteiro do Río Anllóns, Granxa Maruxa, Hifas da Terra, A Parada das Bestas, a Asociación Cultural Mulleres do Mar de Cambados, Conservas Artesanas Curricán, Trasdeza Natur ou a Cooperativa A Carqueixa entre moitas outras. Podes velas todas aquí.
Se queres participar ou sabes dunha muller que fai un traballo que merece ser recoñecido, podes atopar toda a información e as bases da convocatoria na web do Ministerio e na súa sede electrónica. Na propia web do Ministerio tamén hai unha sección de preguntas frecuentes sobre esta convocatoria. O prazo de inscrición está aberto ata o 7 de abril ás 23:59 horas.
Esta é unha oportunidade para dar visibilidade ao traballo das mulleres que manteñen vivo o rural. Compárteo e fai que lle chegue ás mulleres que deberían participar!
